PROXECTO: EMPREGO DE MÉTODOS NON DESTRUTIVOS PARA A SELECCIÓN DE ÁRBORES POR CALIDADE DA MADEIRA NO PROGRAMA DE MELLORA XENÉTICA DO ABETO DOUGLAS (Pseudotsuga menziessi)
Trátase dun proxecto coordinado entre o CIS-Madeira e o Centro de Investigacións Forestais e Medio ambientais de Lourizán que foi seleccionado para ser financiado na convocatoria do ano 2005 do Plan Galego de Investigación, Desenvolvemento e Innovación Tecnolóxica, dentro do Programa de Biodiversidade e Recursos Forestais.
O principal obxectivo é desenvolver un protocolo de medida da calidade da madeira mediante métodos non destrutivos de aplicación ó programa de mellora xenética forestal de Galicia. Este protocolo realizarase sobre unha especie de referencia, o abeto douglas (Pseudotsuga menziessi), aproveitando os ensaios de procedencia e as masas existentes dentro do programa de mellora xenética que desenvolve o Centro de Investigacións Forestais e Medio ambientais de Lourizán.
A calidade da madeira constitúe un dos principais parámetros de selección nos programas de mellora xenética forestais e grande parte da súa variación pode ser atribuída a diferenzas entre as árbores individuais, máis que entre procedencias, o que carrexa unhas altas probabilidades de ganancia a partires dunha selección baseada na árbore individual. Nembargante, a determinación da calidade da madeira polos métodos tradicionais require a destrución do material de ensaio (tala das árbores) e, sobor de todo, un prolongado espazo de tempo para que as probetas teñan o tamaño requirido para o seu ensaio.
Nos derradeiros anos desenvolvéronse métodos de ensaio non destrutivos que permiten solucionar, de xeito parcial, os problemas anteriores. Entre estes métodos destacan o emprego do resistógrafo e de martelos acústicos. O resistógrafo determina a resistencia que se produce na madeira fronte ó avance dunha agulla que a fura a unha velocidade constante, mentres que os martelos acústicos permiten estimar o módulo de elasticidade, en función da densidade da madeira e da velocidade de transmisión do son dentro da madeira.
En Galicia existen programas de mellora xenética desenvoltos polo Centro de Investigacións Forestais de Lourizán con especies coma o abeto douglas (Pseudotsuga menziessi), castiñeiro híbrido (Castanea spp.), cerdeira (Prunus avium) e nogueira (Juglans regia). Con estes antecedentes, o principal obxectivo deste proxecto é o desenvolvemento dun protocolo de ensaios mediante métodos non destrutivos que permita introduci-lo criterio de calidade da madeira en árbores individuais para a súa incorporación ós programas de mellora xenética existentes en Galicia.
Para elo, empregaranse de xeito simultáneo diversos métodos como o resistógrafo e o martelo acústico, contrastando os resultados obtidos mediante ensaios no laboratorio de probetas de madeira procedentes das mesmas árbores nas que fixeron as medidas. As propiedades ensaiadas serán a densidade e o módulo de elasticidade. Asemade, espérase obter información sobre outros indicadores da calidade da madeira, como a variación radial das propiedades ou o área de influenza da madeira xuvenil.
Centro de Innovación e Servizos da Madeira
Emprego de métodos non destrutivos
Última modificación o 06/09/2011 ás 13:45.
